18/1/1994 Yitandukanyije na MINUAR, Habyarimana, Uwilingiyimana na Twagiramungu bacirwa urwo gupfa

Standard

Na: Tom Ndahiro

Ni icyaha cyangwa ubugome, kumenya ko hari umugambi wo gukora jenoside ukabyirengagiza. Ikibigira  icyaha n’ubugome ni uko muri make uba ubaye icyitso cy’abicanyi.

Birushaho kuba bibi iyo ubimenye ufite ububasha bwo gutabara ntubikore. MINUAR yari yarabwiwe n’umunyarwanda wari mu mutwe w’Interahamwe zateguraga jenoside.

Ibyo bari barabwiwe n’uwo munyarwanda, Jean Pierre TURATSINZE byaje kuba impfabusa n’ubwo bari baraperereje bagasanga ari ukuri.

Uretse kandi n’amakuru bari barahawe na Turatsinze hari n’andi MINUAR yari yarahawe n’imiryango nyarwanda yaharaniraga uburenganzira bwa muntu.

Ku itariki ya 18 Mutarama 1994, Turatsinze yahisemo guca umubano n’abayobozi ba MINUAR barimo Gen. Romeo Dallaire.

Icyatumye aca uwo mubano, ni uko yari amaze kubona ko ibyo yari yarakoze byo kubahishurira umugambi wa jenoside yaje gukorerwa abatutsi ntacyo byari bibabwiye.

Ikindi nacyo ni uko yabonaga batagikeneye ko ababwira byinshi. Ikimenyetso yabonye ko batabyitayeho, ni uko yari yarabasabye ko bamurindira umutekano we, bakamushakira ubuhungiro.

Kugera kuri iyo tariki ibihugu by’Ububiligi, Leta Zunze Ubumwe za Amerika n’Ubufaransa byari byaranze guha ubuhungiro Turatsinze n’umuryango we. Aho kumuha ubuhungiro ngo bakomeze kubona amakuru, bahisemo kubireka ngo batiteranya na leta y’Ikinani yateguraga ubwo bwicanyi.

Twibutse ko Jacques Roger Booh-Booh na Romeo Dallaire bari barabonanye na Perezida Juvenal Habyarimana bakamubwira byose bari bazi ku migambi mibisha ya Leta ye.

Birumvikana ko igikurikira kuregera ukwiye kuregwa ari uko akaza umurego mubyo ategura.

Muri ibyo bihugu byimye ubuhungiro Turatsinze, harimo n’icy’Ubufaransa, cyari gifite abayobozi bari bazi kandi bashyigikiye uwo mugambi wa jenoside.

Nyuma yo guca uwo mubano n’abayobozi ba MINUAR, Turatsinze yababeshye ko agiye kuzakora indi myitozo mu cyahoze ari Zaire, (ubu ni RD Congo).

Yakomeje gukorana na bamwe mu basirikare b’ababiligi kugeza ubwo muri Gashyantare 1994, afataye inzira agahungira muri Tanzania.

Ku itariki ya 3 Mata 203 umugore wa Turatsinze  yavuganye n’abakoraga amaperereza ba ICTR. Yababwiye ko umugabo we amaze kugera muri Tanzania yamutumyeho we n’abana akabashyira aho yari yarabateguriye nyuma akajya ku rugamba mu Nkotanyi.

Ngo Turatsinze asanga Inkotanyi hari nk’ukwezi kumwe mbere y’uko Perezida Habyarimana apfa.

Umugore wa Turatsinze yagarutse mu Rwanda muri Nzeri 1994. Ngo nyuma y’igihe agarutse yaje kumenya ko umugabo we yaguye ku rugamba rwo guhagarika jenoside.

Iyo nkuru mbi ko yapfakaye, akaba yarayibwiwe na nyirabukwe ariko nawe wabikiwe na Sheikh Abdul Karim Harelimana.

Icyo bivuze ni uko Turatsinze wari warahisemo kurwanya jenoside atabaza MINUAR, yabonye batabyumva ahitamo kujya ku rugamba rw’abiyemeje kuyirwanya batarinze kubaza New York, Bruxelles cyangwa Washington.

Impuzamugambi na jenoside

Ibyaberaga i Kigali no mu Rwanda ntibyari byoroshye kuba wabisobanurira abantu ngo babyumve.

Abanyamuryango b’ishyaka CDR n’abanyamakuru ba RTLM  bari barakamejeje. Bari bafite ubushizi bw’isoni butagereranya

Ku itariki ya 26 Ugushyingo 1993, Ambasaderi w’Ububiligi mu Rwanda yandikiye MINAFET y’igihugu cye abamenyesha iterabwoba ryari kuri RTLM.

Yabandikiye abamenyesha ko iyo radiyo rutwitsi yari yarahamagariye abakunzi bayo kuzica Minisitiri w’Intebe Madamu UWILINGIYIMANA Agatha, na TWAGIRAMUNGU Faustin wagombaga kuba Minisitiri w’Intebe wa guverinoma y’inzibacyuho yaguye.

Hari hashize iminsi itatu, ubwo ni ku wa 23 Ugushyingo, ubwo ishyaka CDR ryasohoraga itangazo rigenewe abanyamakuru risaba ko Perezida Habyarimana akwiye kwegura, Minisitiri w’Intebe Uwilingiyimana  we akirukanwa.

Iryo tangazo ryasinywe na Perezida wa CDR BUCYANA Martin, ryavugaga ko nibatabikora bazabafata “nk’ibyitso bya FPR-Inkotanyi” kandi ko iryo shyaka rizategeka “rubanda nyamwinshi” rukitegura “gugorahoza abanzi babo n’ibyitso”.

Mu mvugo yakoreshwaga icyo gihe amagambo “icyitso”, “umwanzi” n’ “Inkotanyi” byavugaga Umututsi. Rubanda nyamwinshi bikavuga abahutu.

Hari inomero imwe y’ikinyamakuru Kangura cyari cyaranditse ko Perezida Habyarimana azapfa muri Werurwe 1994. Kinandika ko n’abasirikare b’Ababiligi bazicwa.

Iryo ryari iterabwoba, cyangwa wari umugambi? Byakwitwa amagambo y’abasazi se uko babivuze baranabikoze? Ibyo byose muzabigezwaho.

Kugirango umenye Imvo n’imvano ya jenoside yabereye mu Rwanda, kurikira Umuhamya w’Amateka (Témoin de l’histoire) ku kuri blog: https://umuvugizi.wordpress.com/

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s