21-23/1/1994 Diyoseze ya Nyundo yamaganye abakwiza intwaro Abafaransa bazigemura

Standard

Na: Tom Ndahiro

Ukwezi kwa Mutarama 1994 kugana mu mpera, iterabwoba ry’Interahamwe mu Rwanda n’imyitozo yabo byari bikabije. Imyigaragambyo y’Interahamwe n’Impuzamugambi, yabaga hafi buri munsi.

Abaturiye umujyi wa Kigali bari bamaze kumenyera kubona uduco tw’urwo rubyiruko rwari rwaratojwe  kuzoreka igihugu binaganitse ku mamodoka cyangwa bahagaze ku mapikipiki.

Aho wanyuraga hose wumvaga amaradiyo yuzuye amagambo y’urwango yabaga ari mu maradiyo y’abantu bumva abanyamakuru ba RTLM bavugaga nk’abahanzweho. Amajwi ya ba Bemeriki Valerie, Habimana Kantano, Gahigi Gaspar na bagenzi babo yari amaze kumenyerwa.

Imyiteguro y’intambara nayo yari ikataje. Mu ijoro ry’uwa 21rishyira 22 Mutarama, 1994, ku kibuga cy’indege cy’i Kanombe haguye indege y’Abafaransa yari izanye intwaro nyinshi  rwihishwa.

Iyo ndege yo mu bwoko bwa DC-8 yari izanye intwaro zirimo amakarito 60 y’amabombe akoreshwa mu mizinga mito ya 60mm.

Izo ntwaro MINUAR yarazibonye isanga binyuranyije n’amasezerano y’amahoro ya Arusha bahitamo kuzishyira ahantu harinzwe nabo na FAR. Hashize igihe gito FAR irazijyana zose.

Ku wa 22 Mutarama, biturutse kuri ibyo byose byaberaga mu gihugu, Gen. Romeo Dallaire yasabye abakuru be i New York gutekereza uko bakwagura inshingano bari bahaye ingabo ayoboye.

Gusaba kwagura ibikorwa bya gisirikare, byagombaga gufasha guhangana n’urugomo rw’interahamwe n’umugambi wo gutsemba abatutsi.

Kuri uwo munsi, 22 Mutarama, inzego z’ubutasi z’ububiligi zatangaje ko radiyo rutwitsi ya RTLM yari ifite gahunda yo gushyira umunara ukomeye ku musozi wa Muhe.

Uwo munara nsakazamajwi wari kuba ufite ubushobozi bwa watt 1000, ugatuma ibiganiro by’iyo radiyo byumvikana mu gice kinini cy’uburengerazuba bw’u Rwanda.

Ntabwo habaye kwibeshya kw’amakuru y’abo Babiligi. Mu minsi mike iyo radiyo yatangiye kwumvikana muri ako gace karimo abantu benshi bashyigikiye Interahamwe, n’agace Perezida Juvenal Habyarimana n’abanyakazu benshi bakomokamo.

Impungenge Dallaire yagiraga zari zifite ishingiro. Nko ku itariki ya mbere cyangwa iya kabili Ukuboza 1993  MINUAR yari imaze kubona amakuru ko Interahamwe zakwizwaga hirya no hino mu gihugu.

Uko gukwiza izo nterahamwe byagendanaga na propaganda ibiba urwango muri RTLM ishishikariza abahutu kwibasira abatutsi. Ibyo byatumye MINUAR n’abadiplomati i Kigali basaba leta ya Habyarimana kwihutisha ishyirwaho cya leta y’inzibacyuho. Nibyo babonaga ari igisubizo.

Muri icyo gihe kandi, amabisi (buses) 6 ya ONATRACOM yuzuye Interahamwe zivuye kwitoreza i Gabiro, yahagaze  mu kigo cya gisirikare i Rwamagana basaba kubaha mazutu.

Uwagombaga gutanga ayo mavuta yahamagaye kuri radiyo ya gisirikare abaza abakuru be i Kigali niba byemewe ko aha mazutu amabisi atwaye Interahamwe.

Amakuru akomoka mu bushakashatsi bw’imiryango ibiri mpuzamahanga Human Rights Watch na FIDH avuga ko uwabajije icyo kibazo baramutonganyije cyane kubera ko kuvugira ku maradiyo ya gisirikare kandi yumvwa na benshi.

Yari yamennye ibanga ry’uko ingabo z’igihugu zifasha Interahamwe ku mugaragaro. Byabaye ngombwa

Byari bizwi na benshi bakanabyamagana

Kuri 23 Ugushyingo 1993  umuryango nyarwanda w’uburenganzira bwa muntu AVP (Association des Volontaires de la Paix) wari warasohoye itangazo ryamagana ibitero n’ubwicanyi bwakorerwaga abaturage. Ubwo bugome bwari  b’abayoboke ba MRND na CDR.

AVP muri iryo tangazo basabye ko inkambi z’impunzi z’Abarundi zarushaho gucungwa bihagije kuko hakorerwagamo ibikorwa bya gisirikare. Kandi koko CDR yari yarahamagariye gufatanya kwabo na PALIPEHUTU.

Mu gihe cya jenoside, ibice byari bituriye ikambi z’impunzi z’abarundi habaye ubwicanyi budasanzwe. Urugero ni Kinazi ho muri Ruhango.

Diyoseze ya Nyundo yaratabaje. Ku itariki ya 28 Ukuboza 1993, Musenyeri Wenceslas Kalibushi na bamwe mu bapadiri b’iyo diyosezi basohoye itangazo rigenewe abanyamakuru ku kibazo cy’intwaro zakwizwaga muri za paruwasi bashinzwe.

Iryo tangazo ryasabaga ubutegetsi gusobanurira rubanda icyo izo ntwaro zakwijwe zizakoreshwa. Birumvikana ko nta gisubizo cyatanzwe. Muri mata 1994 ibikorwa byarashubije.

Kuri iyo tariki kandi, umushinjacyaha wa Kigali yasabye ubufasha MINUAR. Icyo yabasabaga ni ukumufasha guta muri yombi Interahamwe yitwa Setiba. Iyi nterahamwe niyo yategekaga izindi zose i Kigali akaba yarajyanaga abasore be kujya kwitoreza mu ishyamba rya Gishwati.

Igipolisi cya gisivili cyakoranaga na MINUAR, umenya baritwaga UNCIVPOL, bagerageje kujya gufata uwo komanda w’interahamwe birabananira kubera ko yari arinzwe n’abasirikare bakitambika. Ni uko byari bimeze.

Ku itariki ya 23 Mutarama 1994, nta gishya kidasanzwe uretse Interahamwe n’impuzamugambi gufunga imihanda no gutera amagrenade hirya no hino mu gihugu.

Kugirango umenye Imvo n’imvano ya jenoside yabereye mu Rwanda, kurikira Umuhamya w’Amateka (Témoin de l’histoire) ku kuri blog: https://umuvugizi.wordpress.com/

One thought on “21-23/1/1994 Diyoseze ya Nyundo yamaganye abakwiza intwaro Abafaransa bazigemura

  1. Ndagushimira cyane kandi ndanagukunda Wowe Tom Ndahiro, amateka utugeza agirira akamaro kuko mbasha kumenya ukuri kuri Genicide yakorewe abatutsi. Byaba byiza ugiye utegura ibiganiro tukabyitabira murakoze .Tel 0788527158 nd imunyeshuri muri ULK nditeguye k unkungayose ijyanye n ubushobozi bwajye.murakoze.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s