Imvugo ‘Abagome n’abagambanyi’ mu mugambi wa jenoside

Standard

Na: Tom Ndahiro

Jenoside irategurwa kandi inyura mu byiciro bitandukanye. Umuntu uvuga ko jenoside yakorewe Abatutsi yatewe no guhanurwa kw’indege yarimo Perezida Habyarimana n’abo bari kumwe, ubivuze aba ari umujenosideri ushakisha kugabanya ikimwaro n’uburemere bw’icyaha.

Utari umujenosideri ariko akemeza ko jenoside “yatewe n’indege” n’uba yarashyigikiye cyangwa ushyigikiye abakoze jenoside ku mpamvu runaka.

Undi nawe ushobora guhuza jenoside no guhanurwa kw’indege, ni umuntu w’injiji itazi amateka y’u Rwanda no gutegurwa kw’umugambi mubisha wo kurimbura Abatutsi. Akenshi akabivuga yarabibwiwe cyangwa se yarabyumvanye abo mu byiciro bibiri bibanza.  Soma n’aha. Ndetse n’aha

Ubushize nanditse ku cyiciro cyitwa “polarisation”, aribyo kwanganisha abantu hakoreshejwe iterabwoba n’imvugoyamamaza urwango. Ibyo biri mu nyandiko nise ‘Habyarimana n’Abagome n’Abagambanyi mu mugambi wa jenoside’. Nkomereje aho.

Muri iyo nyandiko nerekanye ko muri iryo jambo Habyarimana yashyize ahagaragara umugambi wa jenoside yise ibyemezo bari barafashe byo kuzatsinda umwanzi burundu. Anakoresha amagambo “kubuza umwanzi aho amenera ndetse n’ibyitso by’imbere ngo bitongera guhirahira bitekereza intambara”.

Ayo magambo abiri yakoresheje, “Abagome” yongereyeho “abagabagambanyi”, hari abayibajijeho cyane kucyo yashatse kuvuga. Ikinyamakuru IMBAGA cyo cyamaganye ijambo Perezida Juvenal Habyarimana yavugiye muri Kongre yo kuli 28 Mata 1991.

Ishingiro ryo kumwamagana ryari ukuba yaratandukanyije abantu. Agatandukanya rubanda nyamwinshi (abahutu) n’abatutsi kandi we agafata uruhande. Uyu mugambi wamaze igihe kandi warakoreshejwe cyane.

Gutandukanya abanyarwanda byashyizwemo imbaraga

Muri iyi nyandiko nderekana uburyo abateguye bagashyira mu bikorwa umugambi wa jenoside, ko uko kurema icyuho mu bantu bari babikomeyeho.

Ikinyamakuru Kangura cyari cyumvise ubwo butumwa kiramushima ariko ntibarekeye aho. Mu Ugushyingo 1991,  Kangura No 26 cyasubiyemo amagambo ya Habyarimana n’uburyo yashyirwa mu bikorwa.

Ku rupapuro rwa mbere rw’icyo kinyamakuru, hari ifoto ya Perezida Gregory Kayibanda. Hejuru yayo handitse ngo: “Batutsi bwoko bw’Imana” Munsi y’ifoto handitse ngo: “Uwagarura revolisiyo y’1959 y’Abahutu kugirango dutsinde inyenzi-Ntutsi.

Iburyo bw’iyo foto (ibumoso usoma ikinyamakuru) handitse ikibazo: “Ni izihe ntwaro tuzakoresha kugirango dutsinde Inyenzi burundu?” Ku ruhande rw’icyo kibazo hari ifoto ishinze y’umuhoro. Muri jenoside, 1994, uwo muhoro warakoreshejwe koko, nkuko byari byarateganyijwe kandi bikandikwa.

Iki kinyamakuru Kangura, nkuko cyari cyarashyigikiye ijambo rya Habyarimana rivuga ku mugaragaro umugambi wa jenoside, cyakomeje gusobanura neza uko uwo mugambi uteye.

Muri iyi Kangura No 26, harimo inyandiko y’umunyamakuru wacyo Rubera Papias yise “Wategeka nde Wirengagiza Rubanda Nyamwinshi?” (p. 13-14)

Muri iyi nyandiko yamamaje igitekerezo cy’abajenosideri barimo Ikinani cyo gushakisha ubumwe bwo kuzakora ishyano. Yibanze ku kwereka abasomyi be ko amashyaka menshi yari yavutse icyo gihe “yakora uko ashoboye agatuma intambara irangira vuba”. Kurangiza intambara ni nako kuyitsirika Habyarimana yari yaravuze.

By’umwihariko Rubera yagiraga inama amashyaka MDR na PSD kureka gukorana n’irya PL. Yanabwiye “rubanda nyamwinshi” ngo baramenye ntibazagwe “mu mutego wa PL” ishyaka yitaga ko “ryiyemeje gufatanya n’Inkotanyi kugira ngo bashobore (Abatutsi) kugarura ingoma ya gihake mu Rwanda”.

Yaburiye ayo mashyaka ko gufatanya na PL bizayagiraho ingaruka zo gutakaza “abayoboke cyane cyane abatifuza ko ingoyi ya gihake (abahutu) yagaruka mu Rwanda.”

Yakurikijeho iterabwoba, ariko ririmo ukuri ko umugambi wo gutsemba Abatutsi wari uhari kandi barimo babarura abazicwa. Ati: “Rubanda nyamwinshi rero turacyashakisha amadosiye y’ibyitso…”.

Yasabye ayo mashyaka yemewe mu Rwanda ko “yashyiraho Gacaca yo gucoca ibibazo by’ibyitso” ngo kuko icyo cyari igisubizo “cy’ibyitso” byo hanze kureka kubatera. Iyo Gacaca niyo yabyaye Hutu-Pawa mu 1993.

Icyo iyo Gacaca yo gutsinda cyangwa gutsirika intambara nkuko Ikinani cyari cyarabivuze, nacyo Rubera Papias yagisobanuye muri iyo nyandiko ye aho agira ati: “Inkotanyi nta mbaraga zigira, gutsinda iyi ntambara ni ugutsinda ibyitso byose by’Inkotanyi cyane cyane ariko tukumvisha Abatutsi bafite inyota y’ubutegetsi ko kubera ubugome beretse abanyarwanda badashobora kuzongera kubona ubutegetsi.”

Iyo ntambara yavugwaga yari jenoside, bakica Abatutsi bose bo mu gihugu. Iyi nomero ya Kangura iki gitekerezo yagikomeyeho, ishishikariza Abahutu kwanga Abatutsi kubera ko ngo Umututsi  aho ava akagera yanga umuhutu wese atarobanuye.

Icyo kinyamakuru cyagerageje kwerekana uburyo aya mashyaka arwanya MRND ari ibikoresho bya FPR, kugirango iteranye abahutu. Ngo kuri iyo mpamvu Kangura iti: “Dusabye umuhutu aho ari hose, ndetse n’abo bagambanyi bose kuzilikana ko inyenzi ziyuburuye zikagaruka gutera u Rwanda zariyise Inkotanyi nta kindi zishaka kitari ubutegetsi. Ziramutse kandi uwo mugambi ziwugezeho ntabwo hazapfa umuhutu w’umukiga gusa hazapfa umuhutu wese. Byaba byiza rero uwo mwiryane uturimo tugerageje kuwurwanya burundu kuko ariyo ntwaro ikomeye umwanzi akoresha”

Ibyo byanditswe mu nyandiko bise Inyandiko “MDR nikomeza gukorana na PL abahutu bose bazayisigira abatutsi n’abagaragu babo” (p.11).

Muri Mata 1991, Habyarimana avuga ko afite gahunda yo kuzatsemba Abatutsi abyita gutsirika intambara Kangura yari yarasohoye ikinyamakuru gishishikariza “Abahutu” kwunga  ubumwe muri uwo mugambi: “Kuvuga ngo kanaka ni umunyanduga undi ni umukiga ni ugusenya u Rwanda. Bose bagomba kunga ubumwe kuko ari “abahutu ba gahutu”.[1]

Izi nyandiko ku buhamya bw’amateka ni izigamije kwerekana ukuri kw’ibyabaye no gufasha abatazi ibyabaye kubera ko batari bavuka cyangwa bari bato cyane jenoside itegurwa. Abanyarwanda bato nibo bafite uruhare rw’ibanze mu gukumira icyo cyaha cya jenoside, no kubageza ku ntego ya “NTIBIKABE” cyangwa “NEVER AGAIN”.

Kugirango umenye Imvo n’imvano ya jenoside yabereye mu Rwanda, kurikira Umuhamya w’Amateka (Témoin de l’histoire) ku kuri blog: https://umuvugizi.wordpress.com/


[1] Umusomyi wa Kangura muri Kangura N° 14 Mata 1991 p.12

One thought on “Imvugo ‘Abagome n’abagambanyi’ mu mugambi wa jenoside

  1. Pingback: Menya ba Gashozantambara n’Abatoje #Interahamwe muri Gikongoro #Rwanda #Kwibuka20 | umuvugizi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s