Intumwa ya Papa Yasabye Perezida Habyarimana Guhitamo Yesu Cyangwa Shitani

Standard

Na: Tom Ndahiro

Mperuka kwandika uburyo Abajenosideri bagerageje kandi ku ruhande rumwe bakabishobora kwifashisha abayobozi bamwe ba Kiliziya Gatolika kubashyigikira mu mushinga wabo w’ubuhotozi. Soma: RTLM Yasabye Kiliziya Kuyifasha Muri Jenoside. Yabonye Abayoboke i Cyangugu.

Iyo RTLM n’ubwo yabisabye mu mpera z’1993, hari ibyo bari baragerageje na mbere. Mu 1992. Hari ababumvaga bakabashyigikira bucece, n’abataremeraga uwo mushinga w’itsembabwoko.

Intumwa ya Papa yarabiyamye

Uyu mwaka w’1992, wari wuzuyemo agahinda n’imyiteguro ya jenoside. Ariko, hari n’abantu ndetse b’abanyamahanga bagerageje kwamagana ubwo bwicanyi n’ubwo ijambo ryabo ritumvikanye.

Umwe muri abo nibantu banzwe cyane n’ubutegetsi bwa Habyarimana ku buryo inshuro nyinshi bamushushanyaga muri za tract (inyandiko zitagira izina ry’uwazanditse) bamushushanyijeho ibintu byinshi by’urukozasoni.

Uwo si undi ni uwari intumwa ya Papa mu Rwanda, Musenyeri Giuseppe Bertello. Kugeza ubu ni Cardinal kandi akaba ari uwa gatatu mu buyobozi bwa Kiliziya Gatolika.[1]

Nta kabura imvano. Ku wa 13 Ugushyingo 1992, iyo ntumwa ya Papa mu Rwanda, iwe mu rugo, yakiliye Prof. Runyinya Barabwiriza wari umujyanama wa Habyarimana mu ububanyi n’amahanga n’ubutwererane.

Ibyo baganiriye, Runyinya yabigaragaje muri raporo yandikiye Habyarimana bukeye ku wa 14 Ugushyingo.

Ni raporo igomba kuba yarariye Habyarimana bugacya ajya gutonganira mu Ruhengeri. Runyinya, nawe wumvaga arebwa n’ibyo yabwiwe n’intumwa ya Papa yamuhishuriye.

Yabwiye  shebuja ko intumwa ya Papa itavugaga neza MRND. Ko ishusho y’iryo shyaka itari nziza kuri we na busa.

Yamubwiye ko yari afite amakuru ko Habyarimana n’abambari be bategura ubwicanyi mu gihugu hose; ko hari n’umugambi wo gutsemba Abatutsi n’uko hari ubushake bwo kuburizamo amasezerano y’amahoro ya Arusha kugirango impunzi zimaze imyaka myinshi mu mahanga zidataha.

Runyinya yabyanditse muri aya magambo:

Les informations détenues par le Prélat sur MRND sont en grande partie défavorables. Ceci est du essentiellement qu’il les détient des Sœurs et Prêtres en majorité Tutsi, donc favorables aux visées des Inkotanyi. L’opposition interne y est également pour quelque chose. Le Nonce m’a dit qu’il est fort peine et bouleverse d’entendre tout ce qu’on dit de mal en la personne du Président de la République.

  •          Organiser les tueries a travers tout le pays, grâce a son entourage, pour se maintenir au pouvoir;
  •          Etre le concepteur et le catalyseur des activités de la CDR pour exterminer les Tutsi;
  •          Désorganiser l’évolution des négociations de paix d’Arusha pour maintenir le statu quo des refugies.”

Imigambi yose y’ubwicanyi yari yarayimenye arayimubwira. Kwandika ko ayo makuru intumwa ya Papa yaba yarayabwiwe n’ababikira n’abapadiri b’abatutsi cyangwa abo mu mashyaka atavuga rumwe na Habyarimana, ntacyo cyagabanyije ku kuri.

Birumvikana ko Runyinya yaburaniye Habyarimana ko atari umuntu w’indimi ebyiri, ko  aharanira amahoro, ubumwe n’amajyambere.[2]

Ariko ibyo akaba yarabivuze azi ko abeshya kuko yanasobanuye ko MRND ikwiye kugira icyo ikora ngo igaragare neza kandi ikoresheje abayobozi ba Kiliziya Gatolika n’Abaporoso.[3]

Ku mubano wa MRND na CDR Runyinya yabwiye shebuja ko biteye ikibazo imbere y’abareba kure: En clair, l’Alliance MRND-CDR et autres est aujourd’hui mal interprété. Il faut dire des maintenant que MRND relève le bien-fondé de cette concertation et le porte publiquement a la connaissance de l’opinion nationale et internationale.”

Mu magambo a diplomasia, Myr. Bertello yatumye kuri Habyarimana amumenyesha ko kuba yarayobotse CDR yatandukanye n’ubukristu ngo bityo akaba yarabaye umuyoboke wa shitani udakwiriye kubarwa mu mubare w’abemera.

Muri raporo yanditse ati:En terminant sur ce chapitre, le Nonce m’a dit que récemment quelqu’un l’a mis en garde du comportement chrétien du Président, car lui disait-il le Président HABYARIMANA doit choisir entre l’Eglise Catholique et le CDR. Maintenant qu’il a choisi la CDR (dont les actions ne sont pas catholiques c’est-a-dire sataniques), il doit être excommunie et quitter l’Assemblée de Jésus.”

Cardinal Bertello yari ataramara igihe kinini mu Rwanda kuko yahageze kuri 12 Mutarama 1991. Yafashe umwanya we uhagije amenya ibyakorerwaga mu Rwanda.

Muri iyo raporo ya Runyinya kuri Juvenal Habyarimana yamwibukije ko ku wa 16 Ugushyingo 1992, leta ya yari yateganyije ko haba inama y’amashyaka yemewe mu Rwanda. Amusaba ko abayobozi b’amadini Gatolika n’Abaporoso batumirwamo.

Amasezerano yiswe ibipapuro

Nyuma y’iyi raporo bwarakeye haba mitingi ikomeye ya MRND mu Ruhengeri aho Perezida Habyarimana yamaganye amasezerano y’amahoro yari amaze gusinywa Arusha. Amasezerano wumvaga ko yamuteye umujinya. Ibyo Intumwa ya Papa yari yavuze byari byo.

Muri iyo mitingi  yarihanukiriye avugana uburakari bwinshi ngo: Ariko amahoro si impapuro, amahoro ni ku mutima wawe. Amahoro azaza ari uko Abanyarwanda bumvise koko ko uwagiyekubavugira Arusha yabavugiye ibyo bashaka ko atavugiye ishyaka iri n’iri. Ko yavuzeahubwo ibyumvikanyweho muri Guverinoma…Ntagende afindafindaibintu ngo yazanye urupapuro ngo ubwo azanye amahoro. Amahoro se ni urupapuro?”

Ni muri iyo mitingi yari yanatangaje ko abamushyigikiye yemera ari Interahamwe: “Ariko nzi ko abazanyamamaza cyane ari Interahamwe kuko turi kumwe.

Kandi koko muri izo nterahamwe yari umugore we Agatha Kanziga wari umwicaye iruhande yambaye imyenda yazo.

Muri iyo mitingi kandi, Habyarimana yari yanabanje kwemeza ko azamanukana n’Interahamwe mu gihe azagena.

Uwo  yamaganaga muri iyo mitingi atavuze  mu izina yari Boniface Ngurinzira wari Minisitiri w’Ububanyi n’Amahanga, akaba no mu ishyaka MDR. Muri jenoside yakorewe Abatutsi, Ngurinzira nawe Interahamwe zaramwishe. Yicwa nk’abari bariswe “Abagambanyi”.

Amasezerano yasinywe ni ayahe

Ayo masezerano Habyarimana n’abe bari bafite impamvu yo kuyanga. Yari yaragerageje kwangirira amasezerano yose kubera ko kuri we amahoro nyakuri yari ugutsemba Abatutsi nkuko yari yarabigaragaje kuri 28 Mata 1991.

Uko kwangirira niko kwatumye atubahiriza amasezerano y’i N’SELE yo guhagarika imirwano. Amasezerano yashyiweho umukono na leta y’u Rwanda na FPR Inkotanyi ku wa 29 Werurwe 1991.

Ayo masezerano y’i N’SELE yaje kuvugururwa, hasinywa andi  n’izo mpande zombi kuwa16 Nzeri, 1991 i GBADOLITE. Aho hombi hari mu cyahoze ari Zaire (Ubu ni DRC).

Uko kunanirana kwa Habyarimana na leta ye kumva ko bashobora gusangira ubutegetsi n’Inkotanyi, byatumye intambara ikomeza ku buryo Inkotanyi zafashe igice kinini mu majyaruguru bigatuma leta ya Habyarimana yemera gusinya andi Arusha, muri Tanzania ku wa on 12 Nyakanga, 1992.

Ayo masezerano ya Arusha yo guhagarika imirwano yanemeje ko noneho hatangira imishyikirano haagati ya Leta n’Inkotanyi yo mu rwego rwa politiki.

Ayakurikiyeho, ari nayo yashajije Habyarimana n’abambari be, n’amasezerano yasinyiwe Arusha ku wa18 Nzeri, 1992, yateganyaga ko u Rwanda rugomba kugendera ku mategeko.

Aya masezerano yakurikiwe n’andi yemeje Igabana ry’ubutegetsi rishingiye ku ishyirwaho rya guverinoma y’inzibacyuho yaguye. Igice cya mbere cy’ayo masezerano yarashyiriweho umukono Arusha ku wa 30 Ukwakira, 1992, ikiyuzuza gisinywa ku itariki ya 9 Mutarama, 1993.

Kuki umujinya uvuga ibipapuro n’imperuka?

Kumva uwo  mujinya, ni ugusubira mu ngingo zimwe z’ayo masezerano n’uburyo yabangamiraga Interahamwe n’Impuzamugambi.

Amasezerano yo guhagarika imirwano yo kuwa 12 Nyakanga 1992, yavugaga ku buryo guhagarika imirwano atari ku rugamba gusa.

Urugero ni aho bavugaga ko hari ingabo z’amahanga zagombaga gutaha.[4] Ibi byasabaga leta aya Habyarimana gusezerera ingabo z’Abafaransa gusubira iwabo bakareka gushyigikira Interahamwe.

Ayo masezerano asobanura ko guhagarika imirwano atari ku rugamba rw’amasasu gusa ahubwo bivuga ko impande zombi ziyemeje kurwanya ibikorwa byose bishyamiranya abantu, byo mu cyongereza bise “Cessation of hostilities”.

Ibyo bigasobanura ko leta ya Habyarimana yagombaga guhagarika kandi igahana uwo ariwe wese wigisha ivangura.[5] Hagahagarikwa n’izindi mvugo zose z’urwango.

Ibi nibyo byatumye Radio Rwanda n’abanyapolitiki barekeraho kwita FPR “Inyenzi”, n’ubwo aba CDR bakomeje kandi leta ntibahane. Ibi bikaba bishobora kuba biri mu byatumye Intumwa ya Papa mu Rwanda yumva ko Habyarimana ashyigikiye CDR. Kandi byari byo.

Muri make, kudahana CDR n’ibindi binyamakuru nka KANGURA, INTERAHAMWE, KAMARAMPAKA na CDR leta ya Habyarimana yicaga amasezerano y’amahoro yasinye.

Ibyo kurwanya urwango byagarutse mu masezerano yemeje ko u Rwanda rugomba kugendera ku mategeko.

Ingingo ibivuga iri mu gice kivuga ubumwe bw’igihugu (National Unity) ko “Abantu bagomba kureshya imbere y’amategeko… bakagira n’amahirwe angana muri byose…” (Art. 1)

Hakavugwa ko abanyarwanda aribo bagize igihugu cyu Rwanda kandi ko ikibibangamiye cyose gikwiye kurwanywa… (Art. 2)

Ayo masezerano akaba asobanura ko Ubumwe bw’igihugu butabangikana n’ivanguramoko iryo ariryo ryose, ari mu bya politiki n’ubukungu. (Art. 3)

Hanemejwe ko ubumwe bw’igihugu budashoboka ikibazo cy’impunzi kitabonewe igisubizo gihamye, kandi ko gutaha mu gihugu ari uburenganzira budashidikanywa. (Art. 4)

Ibyo byose byaje gushimangirwa n’ibivugwa mu ngingo ya 8 y’aya masezerano yavugaga ko bose biyemeje kurwanya ivangura.[6] Habyarimana n’abe ntibari kureka kubirwanya kandi politiki y’urwango n’ivangura bayibonamo ubuhizi.

Ibi bitekerezo byose, byabangamiraga cyane MRND-CDR kubera ko byababuzaga amahoro kubera ibyaha by’ubugome bari barakoze banategura n’ibindi.

Ikindi cyatumaga banga aya masezerano ni uko ari Inkotanyi zabishiraga ku murongo w’ibyigwa kandi amahanga akabyemera kubera ukuri kurimo.

Kimwe mubyo MRND-CDR bari banze ni ugushyirwaho kwa komisiyo mpuzamahanga yo gusuzuma ibyaha byakozwe mu gihe cy’intambara.[7]

Icyaje muri uru ruhererekane rw’amasezerano, kikabababaza ni ukugabana ubutegetsi, kukabamo kugabanya ubutegetsi bwa Habyarimana. Hakanabamo ko amashyaka arwanya ubutegetsi harimo n’Inkotanyi agira ubwiganze bw’amajwi mu nama y’abaminisitiri no mu Nteko Ishinga Amategeko.

Nyuma y’aya masezerano yo guhagarika imirwano no gushaka ko u Rwanda rugendera ku mategeko hakaba n’igabana ry’ubutegetsi harimo no kuvanga ingabo nibyo byongereye umujinya ku rwango bituma bivamo.

Uwo mujinya niwo watumye Habyarimana ayita ibipapuro (15/11/1992 na Leon Mugesera agashishikariza Abahutu kunyuza abatutsi iy’ubusamo ya Nyabarongo (22/11/1992). Nyuma na Col. Theoneste Bagosora, ari Arusha, agatangaza ko agiye gutegura imperuka mu Rwanda.

Ayo magambo yakurikiwe n’ubwicanyi bwakorewe abatutsi muri Kibuye na Gisenyi 1992-1993.

Hatangiye n’ibihuha by’urwango byavuzwe muri raporo No 07/02.2.1yakozwe ku wa 7 Mutarama 1993 n’ibiro by’iperereza byayoborwaga na Dr. Augustin Iyamuremye.

Iyo raporo yakoreye Ministiri w’Intebe, Dr. Dismas Nsengiyaremye yavugaga ko mu Ruhengeri hari tract ivuga ngo “BANYARWANDA NIMWITEGURE UMWAMI ARAJE”. Iyo nyandiko ikavugwa gutaha kw’Umwami ko ari ingaruka z’amasezerano y’amahoro ya Arusha.

Bakajije umurego, Abafaransa n’Interahamwe bashishikariye kwubaka HUTU-PAWA no gukaza umurego mu myiteguro yo gutsemba Abatutsi.

Izi nyandiko ku buhamya bw’amateka ni izigamije kwerekana ukuri kw’ibyabaye no gufasha abatazi ibyabaye kubera ko batari bavuka cyangwa bari bato cyane jenoside itegurwa. Abanyarwanda bato nibo bafite uruhare rw’ibanze mu gukumira icyo cyaha, no kubageza ku ntego ya “NTIBIKABE” cyangwa “NEVER AGAIN”.

Kugirango umenye Imvo n’imvano ya jenoside yabereye mu Rwanda, kurikira Umuhamya w’Amateka (Témoin de l’histoire) ku kuri blog: https://umuvugizi.wordpress.com/

[1] Cardinal Giuseppe Bertello is the President of the Governorate of Vatican City State and President of the Pontifical Commission for Vatican City State

[2] Runyinya avuga uburyo yabeshye intumwa ya Papa “J’ai eu à montrer au Nonce Apostolique que le Président HABYARIMANA ne peut pas être un homme double de telle façon que ses actions ne correspondant pas sa philosophie exprimée dans le programme d’Unité, de Paix et de Développement de son Parti MRND.”

[3] Mu mwanzuro Runyinya yagize ati : “De cette audience m’accordée par le Nonce Apostolique, il y a lieu de retenir les éléments ci-après : Le MRND est mal famé dans les milieux ecclésiastiques. Compte tenu que ces milieux ont une grande ascendance sur la société rwandaise, il est important de construire une stratégie de le rendant favorable. De surcroit, il est fort probable que les Evêques Catholiques jouent le rôle de médiateur entre les partis politiques. Tant que rien n’est change dans leur impression sur le MRND, on risque fort qu’ils penchent vers un changement radical de la situation politique lors de ces médiations. Il s’impose dès lors aujourd’hui que le MRND entame une campagne d’information à grande échelle sur sa personnalité politique. Tout en ne restant pas sur le défensif (se dévêtir seulement des calomnies), il faut qu’il fasse des initiatives de présenter son projet de société et d’enfoncer avec arguments les autres protagonistes.”

[4]“The withdrawal of all foreign troops after the effective deployment of the Neutral Military Observer Group (NMOG) except for Military Officers serving in Rwanda under bilateral Cooperation Agreements” Art. II (6)

[5] Ayo masezerano avuga ngo “Cessation of hostilities” shall mean the end of all military operations, all harmful civil operations and denigrating and unfounded propaganda through the mass media. Article VII (2)

[6] “The two parties resolutely reject and undertake to fight: political ideologies based on ethnicity, region, religion and intolerance which subordinate national interest to the ethnic, regional, religious or personal interest…”

[7] The two parties also agree to establish an International Commission of Enquiry to investigate human rights violations committed during the war. (Art.16)

 

3 thoughts on “Intumwa ya Papa Yasabye Perezida Habyarimana Guhitamo Yesu Cyangwa Shitani

  1. Pingback: @Kwibuka20 Imyiteguro ya jenoside i Kigali yanogejwe kuwa 29 Werurwe 1994 #Rwanda #Kwibuka20 | umuvugizi

  2. Pingback: @Kwibuka20 MDR Yashinje Bagosora Umugambi wa Jenoside, Abanje Kwikiza Habyarimana #Rwanda #Kwibuka20 | umuvugizi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s