Icyiza Ntigisaza. Nyuma y’Imyaka 30 Amahame ya FPR-Inkotanyi Aracyafite Agaciro

Standard

Na: Ndahiro Tom

Ku wa 18 Nyakanga, i Muhanga, Guverineri w’Intara y’Amajyepfo, Mureshyankwano Marie Rose, yibukije ko mu gihe leta zabanjirije iya FPR-Inkotanyi zakoreshaga umugezi wa Nyabarongo mu kwica Abatutsi, uwo muryango zawukoresheje kuwubyaza amashanyarazi acanira cyangwa amurikira abanyarwanda.

Buri muntu atanga icyo afite. Umuntu agakora akoresheje umumenyi n’imbaraga afite, bigendeye kubyo yifuza n’ibyo ashoboye. Izo leta zakoreshaga umugezi kwica abantu, nicyo bari bazi, bashoboye ndetse bakorana umurava.

Mu gika cya kabiri cy’ijambo ry’ibanze ry’imigambi/Manifesto ya FPR mu 2017-2024, Perezida Kagame Paul yibutsa ko “Kuva Umuryango FPR-INKOTANYI wabaho, waharaniye kubaka Ubumwe bw’Abanyarwanda, kwimakaza Demokarasi mu Rwanda no guharanira Amajyambere y’Abanyarwanda bose.”

Uko kwibutsa ko “kuva umuryango wabaho” kugeza ubu, bifitanye isano n’intego nkuru ya “TWUBAKE U RWANDA TWIFUZA”. Kuba hari ibintu byaharaniwe kuva mu mwaka w’1987,  nyuma y’imyaka 30 bikaba bigifite ireme rishingirwaho muri “TWUBAKE U RWANDA TWIFUZA” ni uko hari icyiza abashinze uwo muryango bifurizaga u Rwanda.

Ni cyo cyatumye nsoza inyandiko iheruka nise “U Rwanda Twifuza Ruzubakwa no Kwibuka/Kumenya u Rwanda Tutifuza” ndarikira umusomyi ko nzisubiza ikibazo cy’icyo u Rwanda rwaba ruri iyo hataba ubuyobozi bw’umuryango FPR-Inkotanyi na Perezida Kagame nk’umuyobozi w’igihugu.

Umuryango FPR-Inkotanyi ufite Intego-remezo 9 zikurikira:

Kugarura Ubumwe bw’Abanyarwanda; Kubumbatira ubusugire bw’Igihugu n’umutekano w’abantu n’ibintu; Kubaka ubuyobozi bushingiye kuri demokarasi; Kubaka ubukungu bushingiye ku mutungo bwite w’Igihugu; Guca umuco wa ruswa, gutonesha, imicungire mibi y’umutungo w’Igihugu n’izindi ngeso zijyanye na byo; Kuzamura imibereho myiza y’Abaturage; Guca burundu impamvu zose zitera ubuhunzi no gucyura impunzi; Guharanira umubano hagati y’u Rwanda n’ibindi bihugu ushingiye ku bwubahane, ubufatanye n’ubuhahirane; no Kurwanya Jenoside n’ingengabitekerezo yayo.

Muri izo ntego nkuru, iza mbere 8 zimaze imyaka 30 ndetse hari n’izindi zimaze imyaka igera kuri 38. Ku wa 1 Nyakanga 1987 nibwo u Rwanda rwijihije imyaka 25 rubonye bwa bwigenge bwapfubye. Mu Ukuboza uwo mwaka, aba ari bwo Umuryango FPR-Inkotanyi uvuka ugashyiraho izo ntego nkuru 8.

Ni ingingo zatekerejwe, zikanashyirwaho, kubera gusubiza ku buryo bwagutse, ibibazo igihugu cyacu cyari gifite uhereye mu gihe cy’Ubukoloni kugeza mu gihe cyose cy’ubwigenge butari bwo. Iya cyenda yo kurwanya jenoside n’ingengabitekerezo yayo yongeweho kubera amateka y’igihugu cyacu uhereye mu mwaka w’1990 kugeza 1994.

Ubutegetsi bwa Repubulika ya mbere n’iya kabiri ntacyo butakoze ngo irondabwoko (racism) n’ivangura-bwoko (racial discrimination) bishinge imizi. Ari mu burezi, mu kazi, mu bucuruzi, mu burenganzira bwa muntu uhereye kubw’Imbonezamubano na politiki, harimo n’uburenganzira bwo kubaho, ku buryo jenoside n’ubundi bwicanyi ndengakamere bwagiye bukorwa ntawe ubakora mu nkokora.

Izo repubulika zombi zahonyoye cyane n’uburenganzira muby’Ubukungu, Imibereho myiza n’Umuco. Ubwo butegetsi bwakomeje gushyira mu bikorwa, politiki zazanywe n’abakoloni. Bakomeje amoko atari yo mu banyarwanda ku buryo mu itegeko nshinga ry’u Rwanda ryo ku wa 24 Ugushyingo 1962 ryemeje ko mu Rwanda hari “race” (Ingingo 3).

Ubwo butegetsi bwakomeje gutanga uburezi ku bantu bake bashoboka, no guheza bamwe hakurikijwe icyo cyiswe amoko hakaza no kwiyongeraho iby’uturere, nkuko abakoloni babigenzaga. Mu mwaka w’1973 Abatutsi birukanwa mu mashuri n’imirimo.

Hakaba no kwirukana abantu mu gihugu cyangwa kubacira ahandi ku ngufu.  Ubwo butegetsi bukanashimangira ko hari abantu bafite uburenganzira busesuye n’abafite ubucagase.

Inkotanyi zerekanye kera icyo ziharanira

Mu Ukwakira 1990, Umuryango FPR-Inkotanyi watangiye kurwanya leta ya Habyarimana Juvenal ku mugaragaro.  Aho kugirango ubwo butegetsi butege amatwi icyo Inkotanyi zashakaga, buhitamo gutegura jenoside bakoze guhera mu 1990-94.

Leta ya Habyarimana yari yaranze gushyikirana n’Inkotanyi. Byanakorwa bikaba ibya nyirarureshwa. Ku wa 29 Werurwe 1991, i N’sele muri Zaire (Ubu ni DR Congo) hasinywe amasezerano yo guhagarika imirwano leta ya Habyarimana yanga kuyubahiriza. Ku rugamba bayotsa igitutu ayo masezerano aravugururwa i Gbadolite ku wa 16 Nzeri 1991.

Ayo nayo arananirana kubera gahunda ya Habyarimana n’Abafaransa ngo yo gusubiza “Inyenzi” muri Uganda. Ayo masezerano y’i Gbadolite yakurikiwe na leta kwongera imbaraga muri propaganda yo gutegura jenoside, ubwicanyi mu Bugesera, n’ahandi harimo. Nyuma y’ubwo imyitozo y’interahamwe yariyongereye, hashingwa ishyaka rya CDR- Impuzamugambi…

Inkotanyi zibokeje igitutu zikanafata ahantu hanini Gicurasi- Kamena 1992, nibwo bemeye noneho ko haba amasezerano yuzuza aya mbere yo guhagarika imirwano yasinyiwe Arusha ku wa 12 Nyakanga 1992.

Icyakurikiye ayo masezerano yo guhagarika intambara, ni Imishyikirano ya Politiki yavuyemo ayakomereje aho Arusha, yavuyemo amasezerano ya nyuma y’amahoro yasinywe ku wa 4 Kanama 1993. Umunsi w’amatora ya Perezida wa Repubulika y’u Rwanda uzaba ari umwaka wa 24 w’ayo masezerano.

Muri iyo mishyikirano, niho Inkotanyi zerekanye ko icyo zirwanira, mbere na mbere, atari ubutegetsi butarimo guhindura imibereho y’abanyarwanda. Ari ubutegetsi bwa Habyarimana, ari Umuhuza n’ibihugu by’indorerezi byarabatunguye. Si byo bari biteze.

Ni imishyikirano yaje gusozwa, amahame remezo umunani ya FPR-Inkotanyi yinjijwe mu masezerano y’amahoro, uhereye ku masezerano yo guhagarika imirwano navuze.

Aya masezerano yateganyije imirongo migari yo kuzaganirwaho mu mishyikirano ya politiki no guhagarika imirwano. Ingingo ya 5 yayo ivuga ko ibizigwa ari bitatu: (1) Gushyiraho ubutegetsi bushingiye ku mategeko bwubakiye k’ubumwe bw’igihugu, demokarasi, amashyaka menshi no kwubahiriza Uburenganzira bwa Muntu; (2) Kurema ingabo z’igihugu zigizwe n’ingabo za leta yariho n’iz’Inkotanyi; (3) Gushyiraho ubutegetsi busangiwe binyuze muri Guverinoma y’Inzibacyuho yaguye.

Kubera ko mu gihugu leta yakoraga ubwicanyi bwinshi na propaganda ya Jenoside, mu ngingo ya 7(2) hasobanuwe icyo imvugo “Guhagarika ubushyamirane” (Cessation of hostilities) bivuga. Ko bisobanura “gugagarika ibikorwa byose bya gisirikare, ibya gisivili byose by’ubugome amahoro na propaganda iyo ariyo yose y’ubugome mu itangazamakuru. Iyi ni ngingo leta ya Habyarimana itigeze ireka kwica. Icyo Radiyo Rwanda n’ibitangazamakuru bya leta byaretse ni ukwita Inkotanyi Inyenzi.

Imishyikirano ya gushyiraho leta igendera ku mategeko itangiye ku wa 10 Kanama 1992, nkuko byari byateganyijwe mu ngingo ya 6 (1) abari Arusha bose uretse intumwa z’Inkotanyi, bari bazi ko mishyikirano izatangirira ku igabana ry’ubutegetsi hagati ya Leta n’abayirwanya.

Intumwa z’Inkotanyi zahereye ku gusobanura neza amavu n’amavuko y’ibibazo by’u Rwanda n’icyatumye intambara ibaho. Icyo kiganiro kirenga isaha kikaba cyari imbwirwa-ruhame yagejejwe ku ntumwa za Leta ya Habyarimana, Umuhuza, Indorerezi, n’abanyamakuru benshi bari aho.

Nyuma y’ubwo Inkotanyi zasabye ko ikibanza cyaba u Rwanda kugira igihugu kigendera ku mategeko. Inkotanyi zinasaba ko imishyikirano yajya ikorwa n’abanyarwanda ukwabo umuhuza n’ibihugu by’indorerezi bikamenyeshwa ibyemeranyijwe n’impande zombi. Niko byakozwe. Ahanini impande zombi zigashyikirana nta basemuzi.

Imishyikirano itangira, intumwa za leta ziyobowe na nyakwigendera Ngulinzira Boniface, ahanini zari zazanye umushinga w’uko ubutegetsi buzagabanwa, amatora azakurikira inzibacyuho, n’ibindi…Inkotanyi zasabye ko hitabwaho ibireba ubuzima bw’abanyarwanda.

Imishyikirano ijyanye n’igihugu kugendera ku mategeko ntiyatinze kuko ishyaka rya Habyarimana, MRND, ryari ritarumva ko icyo rinengwa kigiye kujya mu masezerano y’amahoro.

Ku itariki ya 18 Kanama 1992, ayo masezerano yo kugira igihugu kigendera ku mategeko yarasinywe. Mu irangashingiro ayo masezerano havugwa ko iby’igihugu kugendera ku mategeko bitagomba kugirwa ibya nyirarureshwa, ko ahubwo bigomba guhamya ko agaciro k’umuntu ari rudasumbwa igihe cyose. Binyuranye n’ibyo leta ya Habyarimana yakoraga.

Ni amasezerano afite ibice bitatu biri mu ngingo 16 n’iya 17 isoza. Ubumwe bw’igihugu (4); Demokarasi (8); Kunyuranya ibitekerezo (1); n’Uburenganzira bwa Muntu (3).

Impande zombi zashoje zemeranya ko biyemeje gukora ibishoboka bakabungabunda Ubumwe, Demokarasi n’amahoro nk’indangagaciro zifitiye inyungu umunyarwanda w’ubu n’igihe kizaza. [1]

Iby’aya masezerano n’andi bizakomeza ubutaha.

Biracyaza……

[1] The two parties concur that national unity, democracy and peace are invaluable and solemnly undertake to do everything possible so as to preserve these values in the interest of the present and future Rwandese generations.

 

Advertisements

2 thoughts on “Icyiza Ntigisaza. Nyuma y’Imyaka 30 Amahame ya FPR-Inkotanyi Aracyafite Agaciro

  1. Pingback: Ubufatanye bwa FPR n’andi mashyaka mu kubaka u #Rwanda si ubwa 2017 | umuvugizi

  2. Ngewe nitwa Kabano George, Mubyukuri umuryango ndawurusha umwaka umwe ariko hagati ya za 90 na 93 hafi 94 numvaga sogokuru avuga ngo bagiye muri meeting nkagirango wenda n’ibyubudehe bagiyemo kuko bajyaga babikora mukubakirana no gutabarana.

    Tugeze mu Rwanda amahirwe make ababyeyi banjye naba sogokuru,ba nyogokuru barapfuye bose ntangira urugamba rwokwirwanaho nabavandimwe 2 mpirimbanira kwiga nabavandimwe bange, Imana iradufasha n’umuryango binyuze mumutekano mwiza w’igihugu.
    Gusa muri make ndi umunyamuryango numva undi mumaraso..

    Kandi ndashaka kugira uruhare nifuza ko rwaba rukomeye,nkagira nange itafari nshyira kuri uyu mutagereranywa wacu. Isabukuru nziza y’umurwango wacu RPF INKOTANYI OYEEEEEE!!!!!! ndashimira cyane abagize uruhare rukomeye mukuturemera iyi NKUGE twihishemo akaga kateye n’umwijima wabuditse mu Rwanda 1994 abanyarwanda tugakira ari twe abari mubuhunzi twarokotse macinya, kujorwa nibindi, naho abari murwanda ibyabayeho twarabibonye turabibwirwa IMANA ISHIMWE YOYADUKIJIJE IKANADUHA BA MOSE N”ABARONI NIZINDI NTWARI ZOSE TUGATABARWA..

    Amahoro amahoro.

    George

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s