Ibinyoma bikurangira uwishe Juvenal Habyarimana

Standard

Na: Tom Ndahiro

Iyo ushaka kumenya ahari ukuri guhishwa, umva ubwinshi bw’ibinyoma bivugwa ku kintu kimwe. Ibi nibyo biri ku rupfu rwa Perezida Juvenal Habyarimana.  Niba hari uzi kandi ukwiye kubazwa urwo rupfu ni umugore we n’abana (wenda batari bose) n’abasirikare bakuru b’u Rwanda rw’icyo gihe.

Ku itariki ya 6 Mata 2019, imwe mu maradiyo akorera kuri murandasi yagiranye ikiganiro n’umwe mu bana bato ba Perezida Habyarimana witwa Jean Luc Habyarimana. Muri icyo kiganiro, uwo muhungu yatangaje, ko ku itariki ya 3 Mata 1994, iwabo ku Gisenyi (ntasobanura niba ari iyo mu Gasiza cyangwa iyo hafi ya Brarirwa) bakiriye ubutumwa budasanzwe buzanywe na Jacques Roger Booh-Booh wari n’intumwa yihariye y’Umunyamabanga Mukuru w’Umuryango w’Abibumbye mu Rwanda (LONI).

Jean Luc ngo yiyumviye Booh-Booh abwira se ko aje amuzaniye ubutumwa buvuye ku Mugaba w’Ingabo z’Inkotanyi, Paul Kagame. Ngo: “Uzambwirire Perezida Habyarimana ko nzamwica”. Uwabazaga, Serge Ndayizeye, yagaragaje ko ari bwo bwa mbere ibyo bintu bivuzwe, nyuma y’imyaka 25. Ariko si byo.

Iby’ubwo butumwa budasanzwe, Agatha Kanziga, umugore wa Habyarimana akaba na nyina wa Jean Luc, yari yarabibwiye ikinyamakuru Jeune Afrique, bisohoka muri No 1738-1739 yo ku wa 28 Mata-15 Gicurasi 1994. Kanziga yavuze ko bari batumiye Jacques Roger Booh-Booh ngo basangire pasika yabaye kuri iyo tariki ya 3 Mata. Kanziga akavuga ko iyo ntumwa yihariye yasubiriyemo umugabo we inshuro eshatu ko yatumwe na Kagame ko azamwica akoresheje uburyo ubwo ari bwo bwose.

Iby’ubwo butumwa bwitwa ko bwatanzwe n’intumwa yihariye y’Umunyamabanga mukuru wa Loni wari wahindutse iy’Umugaba w’Inkotanyi yabisubiriyemo Jean Kambanda bahuriye i Nairobi-Kenya mu w’ 1995 anabyandika mu gitabo cye ‘Rwanda face à l’Apocalypse du 1994’ bisobanura u Rwanda mu Mperuka y’1994.

Mbere y’uko bisubirwamo na Jean Luc, byari byaranditswe n’inyandiko ndende y’ingabo z’u Rwanda zatsinzwe (FAR) yiswe “Contribution des FAR à la recherche de la vérité sur le drame rwandais – La guerre d’octobre 1990 et la catastrophe d’avril 1994” Bishaka kuvuga ko batangaga umusanzu wo kumenya ukuri ku byabaye mu Rwanda n’ibyago byo muri Mata 1994. Byananditswe mu nyandiko ya FDLR bise ‘Drame Rwandais’ yo mu mwaka w’2001. Iby’ubwo butumwa bwo kuri Pasika iminsi itatu mbere byaje gusubirwamo na Col. Aloys Ntiwiragabo mu nyandiko ebyiri zitandukanye ariko zuzuzanya mu mwaka w’2015.[1] Hari n’indi ya Ntiwiragabo yanditse nyuma asobanura iby’iryo yicwa rya Habyarimana n’ko bari babizi.[2]

Muri iyo Nyandiko ya ex-FAR, iy’umwimerere mu rurimi rw’igifaransa (ifite impapuro 134 za A4), iby’iyo tariki ya 3 Mata si bike. Uwo munsi nibwo radio RTLM yatangaje ko hagiye kuba akantu uhereye ku ya 4 Mata 1994 ariko bagasimbuka iya 6 Mata bakajya ku ya 7 n’iya 8 z’uko kwezi ho bavuze ko hazaba imirwano. Icyo cyiswe “akantu” byaje kugaragara ko ari ukwicwa kwa Habyarimana n’abo bari kumwe.

Ari inyandiko ya FAR yo mu Ukuboza 1995 n’iza Col. Ntiwiragabo zo mu 2015, zombi zivuga ko kuri iyo itariki ya 3 Mata, hari  Liyetona Hebron w’Umubiligi wari mu ngabo za Loni mu Rwanda (MINUAR) wavugiye mu kabari ko Perezida Habyarimana azicwa.

Ko ku itariki ya 21 Ugushyingo 1993 babonye amakuru y’ubutasi agaragaza ko hari agaco k’Inkotanyi kari kacengeye muri Kigali gafite umugambi wo gushimuta no kwica perezida Habyarimana. Undi mugambi bamenye ni uwo kwica Habyarimana umunsi arahira hanyuma ukaburizwamo n’Abajepe babaye maso.

Ngo kuri 29 Mutarama 1994 Inkotanyi zari ziyemeje kwica cyangwa gufata mpiri Habyarimana bamukuye mu biro bye cyangwa mu rugo rwe i Kanombe. Ngo hari hashize icyumweru, ni ukuvuga kuri 22 Mutarama, Umugaba w’Inkotanyi yandikiwe n’uwitwa Zubere ko kugirango kwicwa Habyarimana bishoboke ari uko haboneka abasirikare 100 muri Kigali bambara gisiviri.

Ku munsi w’iya 25 Gashyantare bari bamenye umugambi wo kuzana imvururu zishingiye ku moko bikozwe na Faustin Twagiramungu wari warateganyijwe kuzaba Minisitiri w’Intebe muri guverinoma y’inzibacyuho yaguye. Ibyo akabikora abikorera FPR-Inkotanyi.

Amakuru yandi y’ubutasi yemeza umugambi wo kwica Habyarimana bikozwe n’Inkotanyi, yabonetse ku itariki ya 26 Gashyantare 1994 nyuma y’impfu za Minisitiri Felicien Gatabazi, wari n’Umunyamabanga Mukuru w’Ishyaka PSD ndetse na Martin Bucyana wari Perezida wa CDR. Muri ubwo butasi ngo bamenye ko Inkotanyi zitashimishijwe no kudasubiranamo kw’abaturage ngo hemezwa gukomeza umugambi wo kwica Habyarimana nk’uburyo bwo kurakaza Abahutu.

Iby’ubutegetsi kumenya amakuru yakabaye yizewe k’urupfu rw’umukuru w’igihugu ntabwo yari ayo babwirwaga n’ubonetse wese. Muri za nyandiko cyane cyane iza Col. Ntiwiragabo, wari ushinzwe ubutasi muri FAR, yemeza ko ku itariki ya 19 Werurwe 1994 ari i Ngondore mu nama yahuje Ingabo za Leta (FAR) n’inkotanyi yamenewe irindi banga ryo kwicwa kwa Habyarimana.

Banemeza ko Col. Ntiwiragabo yihereranywe n’abasirikare bakuru mu Nkotanyi ari bo Colonel Stanislas Biseruka na Lieutenant Colonel Caesar Kayizari (ubu ni Liyetona Jenerali) bamubwira ko Perezida Habyarimana agomba kwicwa kuko yari imbogamizi ibuza Inkotanyi kugera ku butegetsi. Ngo banamubwiye ko inzitizi yari ukubura ibyitso muri FAR.

Umunsi umwe mbere, ku ya 2 Mata, ex-FAR banditse ko bari bafite amakuru yemewe y’ubutasi ko Inkotanyi zifite umugambi wo kwica abaturage, ba ofisiye b’Abasirikare by’umwihariko Umugaba wa FAR hakanicwa abayobozi b’amashyaka ashamikiye kuri MRND. Ibyo bitero ngo byagombaga kubera rimwe kandi bikaba hagati y’itariki 3-9 Mata.

Igwingira rigaragara

Iyo tuvuze igwingira ubibona muri ibi bandika. Perezida Paul Kagame azwi nk’umuntu ushyira mu gaciro, n’umuntu uzi kurema no guhamya ingamba (strategist). Akaba atari umuntu uhubuka. Gutekereza ko yaba afite umugambi ukomeye nk’uwo bamutwerera, akawushyira hanze bigera n’aho atuma umuntu ukomeye muri Loni?

Nyuma y’imyaka 26, hari abatazi Jacques Roger Booh-Booh n’icyo yari ashinzwe. Nk’Intumwa yihariye ya SG wa Loni, Booh-Booh ni nawe wari ushinzwe mu rwego rwa Politiki ingabo za MINUAR harimo na Jenerali Romeo Dallaire. Waba uri muntu ki ugatuma ushinzwe kubahiriza amahoro anahagarariye Loni mu Rwanda, umwereka ko ufite umugambi wo kuburizamo ayo mahoro?

Iyo biba byo, ntabwo Booh-Booh yari guceceka keretse iyo aba na we ari icyitso cy’Inkotanyi. Ntabwo Booh-Booh yari kubona amakuru nk’ayo (mbere y’urupfu) ngo areke kuyashyira muri raporo zo batangaga buri munsi i New York. Ntabwo bishoboka ko Habyarimana yari gupfa uhagarariye Loni yarabibwiwe mbere, ngo areke kugira icyo abivugaho. Kugeza ubu, ayo makuru ari kwa Kanziga n’umuhungu we Jean Luc no mu nyandiko za ex-FAR. Nta n’undi ubyemera uretse abo bafatanyije umugambi wa Jenoside yakorewe Abatutsi. Ari n’abatagira isoni nka Judi Rever na Padiri Serge Desouter ntawigeze ashaka kugira icyo abivugaho n’ubwo ari amakuru atari ibanga.

Nari i Kigali mu Rwanda ba Perezida Habyarimana na Cyprien Ntaryamira bahanurwa mu ndege. Nta na rimwe muri Radiyo Rwanda cyangwa RTLM bigeze bavuga kubyo ushinzwe ubutasi mu ngabo za FAR yabwiwe n’Abasirikare bakuru b’Inkotanyi.

Kuva ku itariki ya 19 Werurwe kugera ku ya 3 Mata harimo igihe kirenga ibyumweru bibiri. Nta buryo atari kuba yarabibwiye Habyarimana na Kanziga kugeza ubwo Booh-Booh atanga ubutumwa ku mukuru w’Igihugu mu munsi mukuru yatumiwemo. Agatha Kanziga yivugiye ko ari umuryango we bari bamutumiye mu Gasiza.

Nongere mbanze nti, utagera ntagereranya? Uwatanze amakuru y’ubutasi ko Inkotanyi zishobora gushimuta cyangwa gufata mpiri Perezida w’Igihugu yumvaga ari ibintu bishoboka? Niba yarumvaga ari ibintu bishoboka, Habyarimana yari ariho atari ho. Ntabwo umutekano wa Perezida waba ukwiriye ngo habeho gutekereza ko yafatwa nk’undi wese.

Ibi byose iyo ubitekereje, wumva impamvu bashoboraga kwandika mu kinyamakuru cyabo Kangura, baha Umukuru w’Igihugu igihe agomba kuzicwa. Yagombaga gupfa muri Werurwe 1994, yicwa muri Mata uwo mwaka. Binasobanura impamvu nyuma y’iminsi ibiri n’igice gusa arashwe umuryango we urimo umugore n’abana bahambiriye utwangushye bakigendera basize umurambo we aho.

Mu guhisha no guhishira abishe Habyarimana, bayobozi ba FAR (1995) bemeza ko FPR-Inkotanyi yafashijwe n’abasirikare b’Ababiligi bari muri MINUAR, bakanashinja Tanzania na Uganda kuba ari bo batumye yaragarutse bwije akicwa saa mbili n’igice (20h30) z’ijoro. Ibyo ni ah’ubutaha!

Biracyaza…

Kuri Twitter @TomNdahiro

[1] Izo Nyandiko za Ntiwiragabo ni:  Le Drame Rwandais: Le non-dit cache a l’opinion mauvaise foi et strategie du pire qui caracterisent le Front Patriotique Rwandais yo ku wa 23/7/2015 na Génocide controversé Bilans contradictoires yo ku itariki 16/12/2015

[2] Rwanda- Attentat du 6 avril 1994- A quand la Clôture de l’Enquête yo ku wa 5/07/2016

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s